Yusif Cabbarov müxtəlif sahələrdə, o cümlədən enerji, telekommunikasiya və maliyyə təşkilatlarında 20 illik uğurlu idarəçilik təcrübəsinə malikdir.

Cənab Cabbarov NEQSOL Holding-in Baş Direktorudur. O, holdinqin beynəlxalq biznesinə nəzarət edir və onun strategiya, birləşmə və sərmayələr (M&A) sahələrinə və biznes portfelinin idarə edilməsinə cavabdehdir. O, həmçinin 2015-ci ildən holdinqin Səhmdar Ofisinin rəhbəri vəzifəsində çalışıb. Cənab Cabbarov strateji və korporativ idarəetmə prinsiplərinə əsaslanaraq holdinqin yenidən təşkili və transformasiya layihəsinə rəhbərlik edib.

Yusif Cabbarov holdinqin tərkibində olan müxtəlif şirkətlərin Direktorlar Şurasının üzvüdür. O, Bakcell şirkətinin Direktorlar Şurasının sədr müavini, həmçinin Vodafone Ukrayna və Cənubi Qafqazın ən iri sement istehsalçısı olan Norm şirkətinin Direktorlar Şuralarının üzvüdür.

Cənab Cabbarov holdinqə 2013-cü ildə neft sahəsində fəaliyyət göstərən Nobel Enerji (öncə Nobel Oil) şirkətlər qrupunda Baş direktorun müavini və Baş maliyyə direktoru kimi qoşulub. O, bu vəzifədə Nobel Oil qrupunun Nobel Energy və Nobel Upstream qruplarına yenidən təşkili layihəsinə rəhbərlik edib.

2000-ci ildən 2013-cü ilə qədər Yusif Cabbarov maliyyə sektorunda çalışıb. O, 2007-ci ildən Azərbaycanın aparıcı kommersiya banklarının birində İdarə Heyətinin sədr müavini vəzifəsində çalışıb və strategiya, marketinq və iri yenidənqurma layihələrinə rəhbərlik edib.

2023-cü ildə Azərbaycanın iqtisadi inkişafına və sahibkarlıq sahəsinə verdiyi mühüm töhfələrə görə “Tərəqqi” medalı ilə təltif edilib.

Cənab Cabbarov Liderliyin İnkişafı Proqramını (PLD in Strategic Management) uğurla başa vurmaqla Harvard Biznes Məktəbinin məzunu olub. O, həmçinin 2007-ci ildə Birminhem Biznes Məktəbində MBA dərəcəsi, 2002-ci ildə isə UNEC-də iqtisadiyyat və maliyyə üzrə bakalavr təhsilini bitirib.